Skrímslahekl, lærðu að hekla út frá eigin hugmynd er byggð þannig upp að nemandinn og eða kennarinn verða að byrja á því að lesa upphaf bókarinnar til að sjá hvernig hún er sett upp. Því næst þarf að fylgja sex skrefum þar sem útkoman er heklað skrímsli. Fyrsta skref er að nemandinn teiknar skrímsli á blað út frá þeim formum sem sýnd eru í bókinni. Síðan er að lesa upplýsingar, skoða myndir og horfa á myndbönd sem tengjast þeim formum sem nemandinn nýtti sér við gerð síns skrímslis. Hvatt er til þess að hekla um leið og horft er á myndböndin. Formin sem kennt er að hekla í bókinni eru: hringur, þríhyrningur, ferningur og ferhyrningur ásamt lengjum, snúrum og spírölum sem hægt er að nota fyrir augu, nef, munn og útlimi. Eins og flestir vita þá eru skrímsli allskonar, sem gerir verkefnið vonandi skemmtilegra fyrir nemandann.